Colombia i FARC ta firma akuerdo nobo pa yega na pas.


E geriyeronan di FARC i gobièrnu kolombiano a firma un akuerdo nobo pa yega na pas. Den un referèdum ku a tuma lugá masomenos seis siman pasá, pueblo di Colombia a rechasá e akuerdo ku partidonan a negoshá. Durante kuater aña largu, presidente Juan Manuel Santos a negoshá e akuerdo ku FARC. Motibu pa kuá el a haña tambe e rekonosimentu di premion nobèl di pas. Ambos partido ta indiká, ku nan a hasi e kambionan necesario den e akuerdo nobo. Den un deklarashon ofisial e partidonan ta bisa : “Nos a yega na un akuerdo nobo pa tèrminá e konflikto ku ta inkluí kambio i proposishonnan di diferente sektor den komunidat. Nos ta hasi un yamamentu na hinter Colombia i komunidat mundial pa sostené e implementashon rapido di e akuerdo nobo, pa di manera ei nos por laga e tragedia akí atrás. Pas no por warda mas”. No ta muchu kla ainda, si lo bolbe bin un referèdum den kuá pueblo di Colombia mester aprobá e akuerdo nobo.