Tur tur dia di nobo nos tin e poder pa skohe kiko i ken nos tei sirbi.

Poder ku ta nase di un regalu ku Dios a duna nos ora E la krea nos.
E regalu di “boluntat propio”. Boluntat propio pa nos skohe ku nos ta sirbi nos sentidonan komo hende, sirbi mundu òf skohe pa sirbi loke ta noble, hustu i digno di alabansa.

Tur dia di nobo nos por skohe entre fe òf miedu, felisidat òf infelisidat, pas òf konfushon. Den poko palabra, nos por skohe entre Dios òf mundu. Kiko ta nifika skohe pa Dios? Skohe pa Dios no tin nada di haber ku religion. E no tin nada di haber ku bai misa, ni kèrki, ni iglesia òf snoa. E tin di haber ku amor, puru i simpel. E ta ora bo skohe pa den tur kos ku bo ta pensa, papia i hasi, bo pone amor dilanti.

Amor den tres. Amor pa Dios, amor pa bo mes i amor pa bo prohimo. Nada mas, ni menos. Kada biaha ku b’a mira inosensia di bo mes òf di bo prohimo enbes di kulpa, b’a skohe pa Dios. Kada biaha ku b’a disidí pa pordoná enbes di kondená, b’a skohe pa Dios. Kada biaha ku b’a disidí pa kompartí enbes di hasi ko’i pichiri, b’a skohe pa Dios. Kada biaha ku b’a mustra kompashon enbes di bira lomba, b’a skohe pa Dios. E dushi dje kos aki ta ku kada biaha ku nos disidí pa skohe pa Dios, E mes ta duna nos e forsa i sabiduria pa perseverá den loke nos ke hasi, den loke nos ta aspirá. P’esei, no ria! Disidí awe ku bo ta skohe pa Dios, tur ora i tur momentu.

Kòrda ku Dios tin un propósito divino i perfekto p’abo. No lubidá nunka ku Dios ta ku’bo komo poder i bida, unda ku bo ta i den kiko ku bo hasi. Biba keriendo e kos aki i mira bo bida proseperá!

(Loke ami a siña di bida)