NASA a aunsiá ku nan lo konstruí un helikòpter ku lo bai bula rondó di e planeta Mars. Aki dos aña e lo manda e aparato pa Mars. Ta trata di un helikòpter sin tripulashon ku lo mester yega Mars den aña 2021. Esaki ta di seis biaha ku ta manda un aparato sin tripulashon pa bula rònt di un otro planeta. E organisashon espasial merikano a anunsiá su plannan den e fin di siman tras di lomba. Lo lansa e asina yamá ‘Mars Helicopter’ huntu ku un otro vehikulo yamá ‘Mars 2020’ ku tampoko tin tripulashon. E helikòpter ta pisa masomenos dos kilo i su chapaletanan ta drai masomenos tresmil rònchi pa minüt, loke ta tres biaha mas lihé di e kantidat di rònchi ku chapaletanan ta drai riba planeta tera. E aparato mes mester planiá su buelo i tuma desishon independiente. Tur komando ku sali for di mundu pa e helikòpter, lo yega algun minüt despues, loke por redultá muchu lat den un situashon krítiko. E helikòpter ta un eksperimentu i si algu bai robes no ta problema, segun NASA. Pero si e logra, e or’ei e helikòpter lo por yega na areanan riba e planeta Mars, kaminda vehikulonan terenal kisas no ta logra yega.