Facebook ta studia posiblidat pa pago virtual entre su usuarionan.


Facebook ta eksplorá e posiblidat pa introdusí su propio kripto moneda. Ku e moneda virtual usuarionan di Facebook lo por paga otro riba e plataforma mes. Asina e wèpsait Cheddar a publiká basá riba informashon di fuentenan interno.

Un di e fuentenan ta indiká ku Facebook ta pensando hopi serio riba e posiblidat.

E kompania lo ke krea e posiblidat pa hasi pago via e plataforma di Facebook i via Facebook Messenger. E transakshonnan lo por tuma lugá den un kombersashon via Messenger o na un sitio indiká den Facebook. Den un reakshon riba e publikashon di Cheddar, Facebook ta splika ku meskos ku otro kompanianan, nan tambe ta eksplorá tipo di posiblidatnan asina. Tin un tim chikí den e kompania ku ta analisando e posiblidatnan i pa awoki Facebook no tin mas informashon pa duna riba e asuntu.