Venezolanonan a subi kaya masalmente kontra presidente Maduro.

Na Venezuela mas ku shenmil hende a subi kaya pa protestá kontra presidente Nicolas Maduro. Nan ta haña ku mas i mas e presidente ta komportá manera un diktador. Gruponan grandi di demostrantenan a okupá krusadanan den i rònt dje kapital venezolano Caracas. Nan tabata grita pa e presidente baha. Durante e protestanan un agente polisial a ser asesiná. Mas ku 120 hende a keda heridá. Pa basta dia ta reina intrankilidat den e pais, debí ku e komishon elektoral a para un referèndùm kaminda votadornan lo por a disidí riba destino polítiko di presidente Maduro. Den e komishon tin varios partidarionan polítiko dje presidente.

Parlamento na Venezuela a aseptá un moshon pa kuminsá ku e prosedura pa baha e presidente. For di elekshon di fin di aña pasá, oposishon tin un mayoria amplio den parlamento.

Mas i mas hende ta bira lomba pa e gobièrnu di Maduro, pasó ekonomikamente, kada dia e situashon den pais ta bira pió. No por haña kasi nada mas pa kumpra den tiendanan. Ademas e entradanan gubernamental a bahá drástikamente debí na e bahada di preis drástiko di petroli riba merkado mundial. Esaki ta hasi ku bida na Venezuela tambe a bira mas karu. E pais komo produktor di petroli, ta dependé pa gran parti riba entradanan di e sektor petrolero.