Un mayoria di na Puerto Rico a vota den un referèndem pa bira un estado integral di Estádos Unídos. E resultado no ta obligatorio, pero segun gobernadó di Puerto Rico, e ta un señal pa e gobièrnu merikano.
E isla den laman Karibe ta un teritorio no-inkorporá den Merka. E portorikeñonan ta siudadano merikano, pero no tin mes tantu derechi. Ora tin elekshon merikano nan no por vota.
Den e referèndem a puntra hende nan opinion tokante e forma estatal di Puerto Rico. Votadónan por a skohe entre e státus aktual, independensia òf bira e di 51 estado merikano. 97% di e hendenan ku a bai vota a skohe pa e delaster opshon. Sinembargo e kantidat di hende ku a bai vota tabata abou. Solamente 23% di portorikeñonan ku derechi di voto, a bai vota. Partidonan di oposishon a hasi un yamada pa bòikotiá e referèndem.
No opstante di esei gobernadó Rossello a papia di un éksito grandi. El a bisa: ”E gobièrnu federal no por ninga votonan di e mayoria di siudadano merikano”.
Kongreso merikano tin e último palabra riba e forma estatal di Puerto Rico. E mayoria repúblikano na Merka no ta sinti mashá pa atmishon di Puerto Rico komo e di 51 estado di e pais.