NASA a tuma 12 astronouta nobo.


E organisashon espasial merikano, NASA a presentá 12 astronouta nobo ku durante e próksimo dos añanan lo keda prepará pa nabegá den espasio.

Ta trata di shete hende hòmber i sinku hende muhé, ku a keda selektá for di 18300 kandidato. Nunka promé e organisashon no a haña asina tantu kandidato. E biaha akí NASA a haña tres bia' mas tantu inskripshon kompará ku e último ronda di solisitut na 2011.

Entre e kandidatonan nobo tin dòkter, sientifiko, pilot i hende di marina. E grupo nobo lo djòin e 44 astronoutanan ku ya ta den servisio pèrmanente di NASA.

Sinembargo ainda no ta sigur ku e kandidatonan nobo lo bai den espasio. For di 2011 Merka no a manda rakèt den espasio. Desde e tempu ei, astronoutnan merikano a bishita e stashon espasial ISS huntu ku e rusonan. Tin astronaut for di e klas di 2009, ku te ainda no logra bai den espasio.

Probablemente den e añanan ku ta bini lo por tin kambio, debí ku presidente Trump lo ke pa Merka bolbe liderá den aktividatnan espasial. E astronoutanan nobo lo por biaha ku rakètnan komersial manera SpaceX i Boeing pa e stashon ISS. Ademas NASA tin plan pa bishitá e planeta Mars tambe.