Presidente Maduro lo tuma pasonan legal kontra oposishon.


Nicolás Maduro a anunsiá ku e lo tuma pasonan legal kontra e aktonan violento di oposishon na Venezuela. E presidente a informá ku e lo tuma pasonan hudisial kontra atakenan ku boseronan di oposishon venezolano a hasi i e kampaña di difamashon kontra di su persona.

Durante e deklarashon ku el a hasi for di Teatro Teresa Carreño na Caracas, el a denunsiá e plannan di e sektornan derechista i figuranan ku el a kalifiká komo traidor. Maduro a insistí riba e nesesidat pa defendé e elekshon ku lo eligí kandidatonan nobo ku lo drenta den e Asamblea Nacional Constituyente (ANC).

Durante su deklarashonnan e mandatario a hasi un yamada na e pueblo venesolano pa uni ku militar sivil pa derotá konspirashon, kòmplòt i gòlpi di Estado ku oposishon ta hibando den kaya, kontra e yamada na ANC.

“Nan ta planeando un konspirashon kontra e proseso konstitushonal”, asina e lider revolushonario a afirmá na momentu ku el a denunsiá e plan di algun dirigente di oposishon, ku a deklará ku nan lo no pèrmití pa e venesolanonan vota riba 30 di yüli.

Maduro a konvoká un Asamblea Nashonal Konstitushonal pa promé di mei pa garantisá pas na Venezuela, restablesé e órden públiko den e pais despues di e manifestashonnan violento, ku a kobra bida di 65 persona i mas di mil herido.