Pa dia promé di yüli, e aerolínea merikano United Airlines ta stòp tur buelo riba Venezuela. Segun e empresa no tin masha demanda pa pasashi i e konekshon entre e siudat merikano Houston i e kapital venezolano Caracas no ta produsí mashá.
Dor di stòp ku e buelonan diario, Venezuela ku ta den estado finansiero malu, ta keda isolá aun mas di restu di mundu. E bahada drástiko di preis di krudo a pone ku Venezuela ta den problema finansiero grandi. E pais ta fokus unilateralmente riba krudo i p’esei ta dependé riba importashon di otro produkto. Pa spar sèn, últimamente a kòrta den importashon di entre otro remedi i alimento.
Pa vários luna kaba demostrantenan ta protestá kontra e maneho di e gobièrnu.