Tweede Kamer a pasa lei nobo pa tap.


Tweede Kamer na Hulanda a duna su aprobashon pa un propuesta pa lei ku ta duna e servisionan di inteligensia AIVD i MIVD mas posibilidat den nan funshonamentu. E lei pa tap ta hasi posibel ku por kolekta i investigá e tráfiko riba internèt di forma ekstenso. Durante e debate relashoná ku e proposishon, ya tabata opvio ku un mayoria lo sostené e proposishon, no opstante ku oposishon tabata hopi krítiko riba e konsekuensianan pa privasidat di hende si e lei aki bin. Ademas Raad van State, ku ta e parlamentu di Reino i e instansia pa Outoridat di Datonan Personal, ta haña ku e outoridat ku mester apliká e lei no ta bon reglá den e propuesta. Mas aleu, ambos organo ta haña e tempu ku e datonan ta keda warda, ta muchu largu. Na final partidonan VVD, PvdA, CDA, ChristenUnie i 50Plus tur a vota pro e proposishon. D66 i GroenLinks a entrega diferente emienda pa ahustá e proposishon pero tur a keda rechasá. Mayoria di Tweede Kamer a pidi gabinete pa pone presupuesto disponibel pa e instansianan di supervishon TIB i CTIVD ku mester kontrolá promé i despues ku duna outorisashon pa por tap.