Apple ta bai traha iPhone na India.


Apple ta bai muda un parti di su produkshon di iPhone pa India, asina Priyank Kharge, minister di ICT den e estado hindú Karnataka ta anunsiá. “Lo bai traha iPhone Apple na Bangalore i lo bende nan den eksterior,” segun Kharge. Na aprel e produkshon lo mester start. E produkshon di iPhone den e pais por subi e kantidat di benta na India. Pakusnan den e pais ta obligá na buska por lo ménos 30 porshento di produktonan ofresé for di India mes. Dor di fabriká iPhone na Bangalore, e telefònnan tambe ta kai bou di e 30 porshento obligatorio pa produktonan. Apple lo por habri nan mes pakusnan na India, sin problema ku legislashon lokal. iPhone tin un parti relativamente chikí di merkado na India. Solamente 2 porshento di telefonnan bendé den e pais ta iPhone. E pais tin mas o ménos 1.25 mil mion habitante. Segun Kharge, gobièrnu di India lo yuda si Apple ke aserká mas fabrikante den e pais, pero no a papia riba mas benefisio práktiko pa e empresa. Segun rumornan Apple kier a haña benefisionan di impuesto den e pais.