Hillary Clinton ta trahando riba un buki tokante e elekshon presidensial ku el a pèrdè kontra Donald Trump. Asina Associated Press ta informá. E buki, ku no tin nòmber ainda, ta bira un kolekshon di ensayo, inspirá dor di sitanan. E buki mester sali den otoño. Banda di esei e buki ‘It Takes a Village’ ku a sali na1996, ta haña un edishon nobo ku ilustrashon pa lesadónan hóben. Ademas Clinton, di 69 aña, a pone su mes disponibel pa duna charla.
Na novèmber aña pasá, e demókrata Clinton a pèrdè elekshon na Merka kontra Donald Trump. Den e sondeonan promé ku elekshon, tabata parse ku e eks-Primera Dama tabata kana dilanti. Clinton a gana e voto popular. El a haña kasi 3 mion voto mas ku Trump, pero a haña ménos elektor.
Clinton no a duna niun entrevista tokante e derota for di despues di e elekshon dia 8 di novèmber último. Durante un reunion ku donantenan den desèmber, Clinton a laga sa ku Trump a gana debí na e ‘hack’nan ruso i akshon di e direktor di FBI ku un siman promé ku elekshon a partisipá ku lo investigá su e-meilnan di nobo.