Den fin di siman rònt muntu mas ku un mion hende a subi kaya pa demostrá kontra e presidente nobo di Merka, Donald Trump. Na Washington so tabatin alrededor di mei mion hende riba pia pa ‘Women's March on Washington’, loke tabata mas ku dòbel di lo ke a spera. Tabata e demostrashon di mas grandi ku a yega di tene na Washington. Ounke a anunsiá ku e marcha ta pa hende muhé, hopi hòmber i mucha tambe a partisipá. A partisipá asina tantu hende ku mester a ahustá e ruta pa motibu di seguridat. No a arestá niun hende.
Na Chicago tambe a bin mas tantu hende ku a verwagt. Ta kalkulá ku mas o ménos 200.000 hende a asistí. E kantidat grandi di hende tabata forma un peliger, p’esei a suspendé e marcha. A buska un lugá mas grandi pa e demostrantenan i e reunion a ser alargá
Na New York 100.000 hende a marcha dilanti di Trump Towers. Na Boston i Los Angeles tambe tabatin mas o ménos 100.000 hende riba pia. Hopi hende muhé tabatin un asina yamá ‘pussyhat”, un mùts ros ku orea di pushi komo referensha na e ekspreshon di Donald Trump “grab em by the pussy”.
