Presidente di Venezuela, Nicolas Maduro a skohe e aliado ekonomista, Ricardo Sanguino, pa bira e direktor nobo di Banko Sentral na e pais. E presidente a tuma e desishon na momentu ku Venezuela ta meimei di un kontrakshon ekonómiko profundo, inflashon enorme i tin hopi skarsedat di produkto.
Sanguino ta un sostené e polítika i maneho di Maduro, pero e ta tambe un persona di lei. E ta remplasá e aktual direktor, Nelson Merentes. asina e lider sosialista a bisa den un programa semanal televisá. Segun fuentenan na Reuters, Maduro a pidi Merentes, ku ta un matemátiko ku a karga e funshon for di 2009, pa e retirá. "Mi ke pa nos kuminsá un etapa nobo den e desaroyo di Banko Sentral di Venezuela,” asina Maduro a bisa den su meil. Na 2015, djis promé ku oposishon a tuma kontròl di Kongreso, e partido sosialista den gobièrnu a kambia lei i anulá e eksigensia ku un presidente di Banko Sentral, mester keda ratifiká pa legislatura. (parlamento)
Kambionan den gabinete di Maduro ta hopi frekuente. Mas tempran den e luna akí, Maduro a nombra e legisladó deskonosí, Ramon Lobo, komo vise presidente pa Ekonomia. Venezolanonan tin falta di kuminda i ta pasa oranan largu den rei na supermerkadonan, miéntras ekonomia di e pais ta sigui kai, debí na e kolapso di preisnan di petrol na 2014. Maduro mes ta bisa ku su gobièrnu ta víktima di un guera ekonómiko, guiá pa oposishon i ku sosten di e komunidat komersial.
Segun ekonomistanan, Venezuela a desmantelá su sistema di kontròl monetario, loke a laga komersio sin sufisiente dòler pa por importá materia prima. Kuater intento pa krea un sistema monetario a frakasá kaba i Maduro ta spera awor ku nombramentu di Ricardo Sanguino komo direktor nobo di Banko Sentral, ku lo bin kambio.