E presidente merikano nobo, Donald Trump a atmirá CIA na momentu ku el a bishitá e ofisina prinsipal di e servisio di inteligensia. Anteriormente Trump a akusá CIA di ta plama notisia falsu. No ta ni dos siman pasá ku un Trump tabata hopi rabiá i a anunsiá ku e servisio di inteligensia no mester a pèrmití nunka pa notisia falsu lèk for di un rapòrt riba posibel informashon difamatorio ku e rusonan tin. Via su kuenta di Twitter, Trump a puntra si e ta bibando na Alemania Nazi. E ekspreshon a kai den masha mal tera serka e hefe di CIA, John Brennan, ku a pidi Trump, komo ku e ta presidente, pa e midi su palabranan.
Den un diskurso den fin di siman, Trump a bisa ku na CIA tin hendenan fantástiko ta traha i ku ta poko hende tin ku por hasi e trabou ku agentenan sekreto ta hasi. Segun e bionario, no tin niun hende manera e, ku tin hopi sintimentu pa e servisionan di inteligensia i pa CIA. Mas aleu e presidente nobo a akusá prensa di a duna un proyekshon robes tokante e kantidat di bishitantenan ku tabatin na Washington riba dia di su inougurashon.
Kas Blanku a anunsiá ku den fin di siman Trump lo tin un komberashon ku Promé Minister britániko, Theresa May na Washington. May ta e promé líder stranhero ku Trump ta risibí komo presidente. Fin di yanüari presidente Trump tin un enkuentro ku e presidente meksikano Enrique Pena Nieto.