IS responsabel pa e atake na Berlin. (VIDEO)


IS ta responsabel pa atake ku a tuma lugá djaluna anochi riba e marshe di Pasku na Berlin. Asina e agensia di notisia Amaq ku ta asosiá na IS a informá. Un trùk a kore drenta un multitut di hende. E atake a laga un saldo di diesun morto. Algu despues di e atake a arestá un hòmber pakistani di 23 aña pero a pone bek den libertat. Outoridatnan na Alemania a informá ku e hòmber ta ninga partisipashon den e atake i ta eksistí e posibilidat ku e sospechoso no ta e outor. Hustisia a bisa ku tin poko evidensia kontra e hòmber pa kuminsá un kaso. Entre tantu a identifiká shete persona. Di e 49 personanan ku a resultá herida, 25 ta den hospital ainda i 14 di nan ta gravemente herida. Segun e minister aleman di asuntunan interno, e outor ta fugitivo ainda. A kuminsá ku un konmemorashon pa e víktimanan na e misa Gedächtniskirche na Berlin. E misa ta keda banda di e marshe di Pasku kaminda un trùk a kore drenta riba e multitut. Riba stul di pasahero di e trùk a haña un hòmber di nashonalidat polako ku tabata morto. Ta sospecha ku ta trata di shofùr di e trùk ku a keda asesiná ku un arma di kandela, dor di e outor di e atake.