New York ke kompensashon pa seguridat di Trump.


E munisipio di New York a pidi gobièrnu merikano 35 mion dòler pa seguridat di Trump Tower den e siudat. E próksimo presidente Trump ta pasa hopi tempu den siudat i konsekuentemente e gastunan pa su seguridat ta haltu. Agentenan pisá armá ta vigilá e kuartel general komersial di Trump for di yüli. Esei tabata momentu ku a bira ofisial ku e lo partisipá na elekshon presidensial komo kandidato pa e partido republikano. Despues ku e republikano a gana elekshon, polis lokal a tuma aun mas tantu medida di seguridat i a inkorporá polisnan na sivil tambe komo parti di totalidat.

Alkalde Bill de Blasio ta spera ku outoridat federal lo kompensá e mionnan ku a ser pidí. E siudat a yega di haña un kompensashon kaba pa operashonnan komparabel. New York ke un kompensashon pa e periodo entre 8 di novèmber te 20 di yanüari, ora Trump keda instalá komo presidente. Mester bin tambe un areglo pa e seguridat di e edifisio durante e periodo di gobernashon ku ta sigui, ku e republikano Trump komo presidente di Merka.