Kompania di aviashon Boliviano no mag bula mas despues di tragedia.


Despues di e aksidente aéreo na Colombia, pa tempu indefiní, e kompania di aviashon Boliviano Lamia no por bula mas. Den e tragedia aéreo aki 71 persona a pèrdè nan bida, entre nan hopi futbolero di e klup Brasileño Chapecoense. Seis persona a sobrebibí e aksidente. For di un grabashon di e kokpit a resultá ku e avion no tabatin mas gasolin. Ademas elektrisidat tambe a kai afó. E piloto di e avion a puntra e toren di kòntròl na Medellin si e avion por a aterisá debí na problema ku kombustibel. Pero pa motibu ku otro avion tabatin preferensha, e avion di Lamia mester a warda shete minüt promé ku e por a baha. Un ratu despues e piloto ta indiká ku nan tin un problema elektróniko i no tin kombustibel. Algun minüt despues e avion a kai den serunan serka di e aeropuerto di Medellin.