Jovenel Moise a gana elekshon presidensial na Haiti.


E komersiante i eksportadó di banana, Jovenel Moise a logra un mayoria den e promé parti di elekshon presidensial na Haiti. E resultado aki ta nifiká ku no tin mester di un di dos buèlta. Ku 55.67 porshentu di votonan kontá, Moise ya tin un mayoria. Asina e resultado temporal, publiká pa e konseho di elekshon ta indiká.

Porfin Haïti, ta bai haña un presidente nobo, despues di un aña di insertidumbre polítiko. Esaki lo keda asina basta ku e kandidatonan pèrdèdó no kuestioná e resultadonan. E promé buèlta di e elekshon presidensial tabata un di dos oportunidat, despues di e elekshon ku a tene un aña pasá. A deklará e resultado di e tempu ei inválido, despues di hopi protesta ku tabatin. Presidente Michel Martelly a baha na febrüari di aña aki, sin skohe un susesor. For di e tempu ei Haïti a keda dirigí pa e presidente interino, Jocelerme Privert.

E elekshon original mester a tuma lugá riba dia 9 di òktober, pero debí na pasashi di orkan Matthew, esaki a keda posponé pa 20 di novèmber último. Na komienso di òktober, orkan Matthew a kastiga e pais ku ta sumamente pober. Mas ku 1000 persona a muri i miles a keda sin un dak riba nan kabes. Nashonnan Uní a pidi pa pone sigur 100 mion euro disponibel pa e víktimanan.