Forsa Aéreo Filipino, a bombardiá militantenan di ISIS den sùit di e pais. E akshon ta un respaldo pa sòldánan ku ta kombatí e teroristanan na tera. Pa di tres dia siguí, ehersito ta den lucha ku un movementu ku ta apoyá Estado Islámiko. E ofensiva a bini, despues ku e grupo militante Maute a okupá un ofisina prinsipal di gobièrnu den provinsia Lanao.
E milisia di Maute lo ta konsistí di sinkuenta pa shen persona, ku a hisa e bandera di IS, despues ku nan a okupá e ofisina prinsipal di gobièrnu. Den fin di siman, trupanan a ataká na tera. Den e konfrontashon, diestres sòldá a keda heridá. Debí na e disturbionan, míles di sivil a huí for di e region. E grupo di rebeldenan Maute ta responsabel pa un atentado ku bòm den un marshé nokturno na Davao. Den e atentado, dies persona a pèrdè nan bida. Den e parti sùit di Filipinas ta hopi intrankil. Aparte di e grupo Maute, tin tambe e grupo terorista Abu Sayyaf, ku tambe ta aktivo. Presidente di Filipinas, Duterte no ke pa IS haña un posishon fuerte den e pais, p’esei e ta baha ku man duru riba e teroristanan.