Barack Obama a bira emoshonal durante entrega di premio na Ellen DeGeneres. (VIDEO)


Presidente Obama a otorgá 21 merikano e medaya presidensial di libertat (Presidential Medal of Freedom). Esaki ta e kondekorashon sivil mas haltu ku un siudadano na Merka por haña. Entre esnan ku a risibí e kondekorashon tin artista, atleta i sientífikonan, ku a yuda Barack Obama bira e persona ku e ta. Diferente personahe famoso a risibí e kondekorashon. Entre otro Tom Hanks, Robert De Niro, Diana Ross i Michael Jordan. E diskurso ku a hasi mas impakto sin embargo ta esun ku Obama a duna na honor di e presentadó di televishon i aktivista pa derechonan di hendenan LGBT (lèsbi, gay, biseksual, transgenero), Ellen DeGeneres. Presidente Obama a bisa: “Ta fásil lubidá despues ku nos a yega asina leu, ku awor pa lei matrimonionan ta igual, kuantu kurashi a tuma Ellen pa sali pa su seksualidat públikamente kaso 20 aña pasa. E ta importante no solamente pa e komunidat LGBT pero pa nos tur mira den un hende asina tantu bondat i lus. Un hende ku nos gusta asina tantu, un hende ku por ta nos bisiña of kolega of nos ruman. Un hende ku a reta nos propio suposishonnan i kòrda nos ku nos tin mas kos en komun ku nos mes ta realisá. Ta un hende ku a pusha nos pais den direkshon di hustisia. Lo tabata un peso inkreibel pa karga, pa riska bo karera di e forma ei. Tiki hende ta hasi esei”. Durante e diskurso tabata notabel ku Obama a bira emoshonal na momentu ku el a ekspresá e palabranan. 
Na final di su spich e Presidente a hasi un chiste paresido na esnan di DeGeneres, pa asina pone pa esnan presente hari, debí ku despues di e diskurso hopi di esnan presente a bira emoshonal.