Di forma kategóriko, Presidente chines, Xi Jinping a bisa e lider di Hongkong, Leun Chun-ying, ku no tin espasio pa un Hongkong independiente den China. Esaki Chun-ying a deklará despues di un kòmbersashon ku Jinping durante e kumbre APEC na Lima, kapital di Peru. Segun e agensia di prensa estatal di China Xinhua, e presidente di China Xi Jinping a pidi e lider di Hongkong, pa garantisá seguridat na Hongkong, riba kuá Chun-ying a bisa di lo hasi esei.
Hongkong, ku ta un èks kolonia di Gran Bretania, konosé e polítika di un pais-dos sistema. Na 1997, ora ku a traspasá Hongkong pa China, a palabrá ku e pais lo tin su propio gobièrnu, polis i libertat di prensa. Dos miembro di parlamento elegí a ninga luna pasá di deklará bou di huramentashon, ku nan ta keda fiel na China. Despues di esei a ekskluí nan, pasó segun korte nan a ofendé e pais asiátiko. Ultimo lunanan tabatin demostrashonnan na Hongkong di gruponan ku ke pa Hongkong bira independiente. Gobièrnu chines ta kontra pa Hongkong mas independensia políitiko i a atvertí di kastigá hendenan ku ta duna sosten abiertamente na e idea di independensia. Habitantenan di Hongkong ta teme pa mas influensia for di Peking. Dos aña pasá, den e asina yamá “revolushon di paraplu”, studiantenan i otro defensornan di demokrasia a okupá gran parti di Hongkong, pa eksigí ménos metementu chines.