top of page

Donald Trump a bishita Presidente Obama na Kas Blanku.


“Tabata un enkuentro ekselente. Nos a trata un kantidat amplio di temanan,” asina Presidente Barack Obama a bisa. Djaweps e Presidente i Donald Trump a topa otro na Kas Blanku. Según Obama e kombersashon a dura mas ku un ora i mei. Nan a papia entre otro riba asuntunan interno di Merka i tambe riba asuntunan eksterior. “Nos a papia riba algun asuntu organisatorio relashoná ku entrada den Kas Blanku,” asina Obama a bisa e miembronan di prensa. E Presidente saliente a bisa di lo duna tur kooperashon durante e periodo di transishon. “Ta importante pa nos bini huntu i traha huntu pa enfrentá e retonan nos dilanti,” asina Obama a splika. Na su turno Donald Trump a bisa ku e tin masha rèspèt pa Presidente Obama. E ta spera ku e repúblikanonan i demókratanan por traha huntu den e periodo ku ta sigui. Según Trump, nunka promé nan dos no a topa di e forma aki.

Ta un tradishon na Merka, ku un dia despues di elekshon e presidentenan ta topa otro. Despues di e enkuentro ku Presidente Obama, Trump a bishita tambe e repúblikano Paul Ryan, ku ta Presidente di e Kas di Delegadonan merikano. Dia 20 di yanüari tin e seremonia ofisial, kaminda Donald Trump lo hura komo e di 45 Presidente merikano.

bottom of page