E kompania Tesla lo bini ku panchinan di dak pa kasnan ku ta fungi komo panelnan solar. Asina CEO di e kompania, Elon Musk a anunsiá den fin di siman. E panelnan ta konsistí pa gran parti di glas di kuarso i nan no ta parse panelnan solar. Nan ta parse panchi di dak normal i ta di material un poko mas fuerte. Segun Musk e panchinan di dak lo ta mas duradero ku e kas mes i nan por kontra tur tipo di kondishon di tempu. Musk a laga mira algun di e kasnan ku panchi di dak di panel solar. Paden tin un bateria di Tesla ku ta suministrá e energia ku mester.
E vershon aktual di e panelnan solar den forma di panchinan di dak di Tesla, ta mes un efektivo ku konvertí lus di solo den elektrisidat, ku e panelnan solar tradishonal. Sinembrago Musk a bisa ku e empresa ta trata di haña un manera pa hasi e panelnan aun mas efisiente ku panelnan solar tradishonal. Nan ke logra esaki dor di entre otro fangu lus den e panelnan i asina limitá e pèrdida di energia.
E anunsio a bini bispu di un reunion importante di akshonistanan di Tesla. E akshonistanan mester disidí si nan ta tuma over e fabrikante di panelnan solar, Solar City. Solar City tambe ta un kompania di Musk. Den verano di 2017, Tesla ta spera di kuminsá ku instalashon di e promé daknan di panel solar na Merka. Musk no bisa kiko e preis eksakto di e panelnan lo bira, pero el a indiká si, ku e panchinan di dak di panel solar, lo ta masomes mes karu òf barata ku e e panelnan solar tradishonal. E daknan ku panelnan solar ta pas den e mishon dje kompanianan di Musk. E ta entre otro doño e kompania di nabegashon espasial SpaceX i fabrikante di outo eléktriko Tesla. Nan vishon ta pa hasi humanidat ménos dependiente di kombustibel fósil.