Ocho morto den atentado na Nigeria.


Dos eksploshon ku a tuma lugá djasabra, den e siudat nigeriano Maiduguru, a kosta bida di sigur ocho persona. E atentadonan probablemente ta trabou di Boko Haram, segun e agensia di notisia AP. E promé atentado tabata na un kampamentu di refugiado den e siudat. Un testigu a deklará ku dos terorista siusidio tabata purba drenta e kampamentu kaminda tin 16.000 refugiado ta biba.

E di dos atentado a tuma lugá mei ora despues, masoménos un kilometer mas leu. Un baiskel taksi ku dos hende ariba a eksplotá. Despues di un periodo basta trankil, pero relativamente kòrtiku pa motibu di disturbio tokante liderasgo den e organisashon di Boko Haram, atrobe e organisashon kuminsá ku su atakenan. Boko Haram ta aktivo prinsipalmente den e part nort ost di Nigeria. Maiduguru, ku tin aproksimadamente un mion di habitante, ta keda den e área ei.