FBI ta bolbe habri investigashon riba Hillary Clinton.


Faltando apenas 11 dia pa elekshon na Merka, ta surgi un buelta sorpresivo, ora ku FBI a disidí ku ta bolbe habri e kaso di investigashon tokante e i-meilnan di Hillary Clinton. Na yüli último, e direktor di FBI, James Comey, a deklará ku nan a kaba ku e investigashon, pero awe el a manda un karta pa Parlamentu pa indiká ku FBI tin motibu pa bolbe habri e investigashon relashoná ku e kandidato demokratá. “Relashoná ku un kaso ku no tin di haber ku e investigashon, FBI a topa algun i-meil ku informashon nobo ku por ta relevante pa e kaso,” asina Comey a skibi den su karta. Según e kadena di notisia NBC, no ta asina sí ku Hillary Clinton lo a skonde e i-meilnan ku FBI a deskubrí awor. Durante su periodo komo Minister di Asuntunan Eksterior entre 2009 pa 2013, Hillary Clinton a usa su kuenta privá pa manda i-meil. Según e investigashon di FBI, ku a dura mas ku un aña, un parti chiki di e i-meilnan tabata kontené informashonnan sekreto. Clinton a manda 110 i-meil, ku tabata kontené informashon sekreto, for di su kuenta privá. 36 di e i-meilnan tabata sekreto i 8 tabata konfidensial. Dia 8 di novèmber tin elekshon na Merka i e desishon di FBI ta yega na momentu ku e kandidato demokratá ta dilanti di den enkuestanan. Na varios okashon e kontrinkante di Hillary Clinton, Donald Trump, a bisa ku e investigashon tokante uso di i-meil di Clinton, no bai korekto. Den un promé reakshon, despues ku e notisia a sali, Donald Trump a bisa ku e tin masha rèspèt pa FBI. E kaso aki ta pio ku “Watergate”, ku por ser konsiderá komo e skandal presidensial mas grandi na Merka. Na 1974, debí na “Watergate”, presidente Nixon mester baha komo presidente di Merka. FBI no por a duna muchu informashon ainda relashoná e desishon pa habri e invistigashon riba Clinton atrobe, ni tampoko por a bisa kuantu tempu e investigashon lo dura.