Asamblea Nashonal na Venezuela ke pa presidente Maduro baha.


Tenshon a oumentá mas na Venezuela, awor ku oposishon a bini ku un resolushon pa kuminsá un proseso politiko kontra presidente Nicolas Maduro. Oposishon ta kulpa e presidente sosialista entre otro ku e i su partido a trapa demokrasia. E debate den parlamento a bira un problema ora sentenáres di simpatisante di e presidente a fòrsa drenta den e edisifisio di Asamblea Nashonal di Venezuela. Nan tabata grita lemanan anti-parlamentario. Nan a bandoná sala ora e lider di e partido sosialista a pidi nan esei. Den e siman ku a pasa un hues, supuestamente ligá ku presidente Maduro, a prohibí oposishon pa organisá un referèndùm. E idea ta pa pueblo por vota kontra e impopular presidente Maduro. E desishon a kousa hopi disgustu den e pais. Mesora míles di demostrantenan a manifestá kontra e desishon ku nan ta konsiderá antidemokrátiko. Oposishon ta papia di un “golpe de estado” dor di Maduro i su partido sosialista. Asamblea Nashonal a aseptá un moshon pa investigá e ròl di Maduro den e gòlpi aki. For di elekshonnan na desèmber aña pasá, oposishon tin un mayoria amplio den Asamblea Nashonal.

Segun opservadornan, e intento pa tuma pasonan hudisial kontra e presidente, ta hasi e krísis konstitushonal na Venezuela aun mas profundo. E chèns ta chiki ku ta logra yega na kondená e presidente. E sosialistanan tin kòntròl riba poder hudisial i otro institutonan grandi.

Ekonomia venezolano a sufri enormemente dor di e preis abou di zeta. Pueblo ta murmurá pa basta tempu kaba i segun enkuestanan 80% di pueblo, lo ke mira Maduro bai preferibel promé ku e aña aki terminá.