Cuba i Merka ta firma akuerdo di kooperashon pa investigashon di kanser.


Cuba i Merka a firma un akuerdo di kooperashon na La Habana, pa kòntròl, evaluashon i investigashon kontra kanser. Esaki tabata motibu di un bishita ofisial na e isla, di e minister di salú merikano, Burwell. E titular cubano Roberto Morales i e minister merikano Sylvia Burwell, a firma e tratado den e sede di Ministerio de Salud de Cuba. Burwell a yega Cuba pa partisipá tambe na un enkuentro regional relashoná ku desaroyo di un strategia komun pa ku virusnan manera zika, dengue i chikunguña, asina e agensia di notisia Efe a informá. E akuerdo pa lucha kontra kanser tin komo meta, implementashon di proyektonan di kolaborashon, organisá reunión-, konferensia- i tayernanan, interkambio di informashon i eksperensha. Ku e firmamentu, Burwell a ekspresá e interes di Merka pa desaroyá un trayekto di kooperashon ku Cuba den e lucha kontra kanser. E titular di salú merikano a indiká ku prioridat di su país ta pa traha huntu, tantu den e parti di prevenshon komo detekshon di e malesa, ku ta un di kousanan mayor di morto na mundu. "Den e aspektonan aki, nos ke determiná kua ta e mihó hèrmèntnan pa kompartí, pa mehorá konosementu dor di standarisá e tratamentunan i generá kontesta ku ta pèrmití nos traha huntu di un mihó manera, na servisio di nos pueblonan,” asina minister Sylvia Burwell a indiká.