Probablemente lidernan di ISIS ya a huí for di Mosul.


Segun e ehérsito merikano, probablemente e lidernan di ISIS (Estado Islamítiko), a huí kaba for di e siudat irakí Mosul. Aktualmente e siudat Mosul ta ser liberá dor di trupanan irakí ku yudansa di un koalishon internashonal. E general merikano Gary Volevsky, ku ta dirigí e trupanan ku ta ataká e siudat for di tera, a bisa BBC ku tin moveshonnan di ISIS pa sali for di Mosul i ku tur probabilidat tin hopi lider tambe den nan. Na Mosul lo tin entre 3500 pa 5000 guerero di ISIS. Segun Volevsky prinsipalmente stranheronan ku a afiliá na IS ta sigui bringa den e siudat. “Nos ta spera ku hopi stranhero lo keda, pasó kompará ku e guereronan òf lidernan lokal, nan no por sali fásil sin ser opservá. Nos ta spera un bringamentu.

Segun Nashonnan Uní ainda lo tin mas o ménos 1.5 mion siudadano den e siudat di Mosul i IS lo ta usa e siudadanonan komo eskudo humano. E avanse ta lento den diferente pueblo rondó di Mosul, ku ta ser liberá dor di trupanan irakí i kurdo. Segun un bosero di ehérsito irakí, ISIS a sufri pèrdidanan pisá.

Milisia chíita i sunita tambe ta partisipando, meskos ku rebeldenan respaldá dor di Turkia. E koalishon dirigí dor di merikanonan ta sostené e operashon ku atakenan aéreo. Turkia tambe a djòin e koalishon. Segun e promé minister irakí Haider al-Abadi e úniko trupanan ku por drenta Mosul ta e ehérsito irakí i polis nashonal irakí.