top of page

119 mion hende na Europa ta biba na rant di pobresa.


Kasi 119 mion hende den Union Europeo tin e rísiko di biba den pobresa òf den eksklushon sosial. Esaki ta ekivalente na kasi 24% di e poblashon di Union Europeo. E porsentahe ta bai bèk na e mesun nivel di temporada ku e krísis finansiero a kuminsá, segun e ofisina di statistik Eurostat. Den e definishon di Eurostat ta trata di entre otro hendenan ku un entrada relativamente abou. Tambe europeanonan ku no por paga nan gastunan fiho òf gastunan imprevisto. Tampoko nan por bai ku fakansi òf kumpra aparatonan elektróniko. Den e porsentahe a inkluí tambe personanan ku ta traha relativamente tiki ora. Na 2008 e porsentahe tabata 23.7% i na 2009, 23.3%. Pa 2012 e tabata 25%. Na 2014 i 2015 e porsentahe a baha bèk. E paisnan ku e porsentahe mas haltu ku rísiko pa biba den pobresa aña pasá tabata Bulgaria ku 41.3%, Rumania ku 37.3% i Gresia ku 35.7%. Esnan ku e porsentahe mas abou a resultá Repúblika Checa 14%, Suésia 16%, Hulanda i Finlandia ámbos ku 16.8%. E kantidat di hende ku rísiko pa biba den pobresa na Hulanda a oumentá. Aña pasa tabata trata di 2.8 hulandes. Kompará ku aña 2008 Gresia ta e pais ku e oumento mas grandi, esta 7.6%. Sigui pa Chipre i Spaña ku respektivamente 5.6% i 4.8%.


bottom of page