Ta bai pone Servisio di Impuesto Ulandes bou di kuratela. Esaki ta loke sekretario di estado, Eric Wiebes di Finansa ta skibi Tweede Kamer. Ta un di e pasonan pa kambia e kultura di ‘outonomia’ dje servisio. E sekretario di estado ta reakshoná riba e reorganisashon fiskal, ku a sali kompletamente for di man. Inspekshon di Finansa di Reino, ta bai sòru pa tira un bista riba gastunan di e Servisio di Impuesto. Por lo demas un komishon di “sabionan” lo investigá ta kon ta tuma resolushonnan na e Servisio di Impuesto Ulandes. Na desèmber kaba, e komishon mester presentá rekomendashonnan. Ademas un outoridat altu lo bai atendé kon pa pone e parti fiskal kai mas lihé posibel bou di Ministerio di Finansa.
Un areglo boluntario pa personal por a baha for di servisio, a bin resulta mas karo di loke a plania inisialmente. Esaki a sosodé pasó muchu mas tantu hende a mèldu pa hasi uso di e areglo. Segun e plan inisial 4.800 personan lo mester a baha. Awor ta resultá ku segun kálkulo e kantidat lo bira entre 5.200 i 5.800. E areglo pa personal baha ta bai kosta finalmente 70 mion euro mas ku a presupuestá. E intervenshon fuerte ta nesesario, pasó Servisio di Impuesto tabata bai demasiado nan propio kaminda. E dirigentenan na Ministerio di Finansa, a haña nan mes lomba kontr’í muraya, ora a kuminsá atendé e areglo pa baha personal. Na e Servisio di Impuesto Ulandes a “konfia demasiado riba kontaktonan informal den un sírkulo chikitu”, asina Wiebes ta sibi Tweede Kamer.
E sekretario di estado a hañ’é den problemanan siman pasá, durante Deliberashonnan General Finansiero (Algemene Financiële Beschouwingen) tokante e asuntu. E or’ei Tweede Kamer a eksigí un relato amplio di echonan.