Míles di kolombiano a subi kaya den un marcha di protesta na Bogota. E demostrantenan ke pa gobièrnu di e pais i FARC sera un akuerdo di pas akseptabel. E manifestantenan a yama e marcha “Marcha de las flores” i komo tal e gran mayoria tabatin un flor bistí. Den luna di sèptèmber último, despues di hopi aña di negosiashon, e grupo paramilitar di FARC i gobièrnu di Colombia a yega na un akuerdo pa finalisá e guera sivil mas bieu den Amerika Latina. Sinembargo durante un referèndùm pa ratifiká e akuerdo, pueblo di Colombia a vota NO i rechasá e akuerdo. Segun e kampo di NO ku a rechasa e akuerdo, e kondishonnan pa e miembronan di FARC lo ta muchu suave. E manifestantenan ku a subi kaya den kapital di e pais, ke pa gobièrnu i FARC sali for di e impase ku a surgi despues di resultado di e referèndùm i sigui negoshá pa yega na un akuerdo ku ta mas aseptabel pa tur hende.