Samsung a para benta mundialmente di Galaxy Note 7.


E kompania koreano ke investigá e tantisimo reklamonan tokante peliger di kimamentu dje telefònnan modèl Galaxy Note 7. E kompania ta pidi tur usuario ku tin un dje telefònnan pa paga esaki i no usé mas. Nan lo hasi tur posibel pa remediá e situashon. Ya kaba e kompania mester a yama bèk miones di selular, debí na informenan ku e bateria di e telefònnan por eksplotá. E mas resiente suseso ta ku mester a evakuá un avion na Merka, pasó un dje telefònnan lo a eksplotá den e avion. Djaluna e kompania a para produkshon di telefònnan i un dia despues Samsung a anunsiá ku e ta para benta mundial di Galaxy Note 7. Klientenan ku tin un dje telefònnan akí, por kambi’é pa un otro modèl.