Presidente Manuel Santos di Colombia ta gana premio Nobel di Pas.


Sinku dia despues ku pueblo di Colombia a rechasá e akuerdo di pas entre gobièrnu di e pais i FARC, presidente Juan Manuel Santos ta gana premio Nobel di Pas. E komité norwechi di Nobel a elogiá Santos pa su determinashon pa para e guera sivil mas largu den Amerika Latina. Mas ku 200.000 kolombiano a muri durante e guera ku a kuminsá den dekadá 60. Tradishonalmente ta duna ambos partido e premion den un proseso pa yega na pas, pero den e kaso aki a duna e premio solamente na e presidente di Colombia. “Dor di duna e premio na Santos, no ta nifiká ku ta menospresiá e otro partidonan,” asina presidente di komité, Kaci Kullman a bisa Associated Press. Presidente Santos a dediká e premio na pueblo kolombiano. “E premio aki ta di boso,” el a deklará for di kas presidensial, den kompania di su kasá Maria Clemencia. “E premio aki ta pa e viktimanan i no tin mas viktima”, Santos a bisa. Rodrigo Londoño di FARC, mihó konosí komo Timochenko a bisa den un reakshon ku e úniko premio ku nan ta asipirá ta esun di pas i hustisia sosial pa Colombia. Opositor di Santos i lider di e kampo di “no”, Alvaro Uribe a reakshoná via su kuenta di Twitter. “Mi ta deseá ku e premio lo kondusí na kambia e akuerdonan dañino pa demokrasia,” Uribe a ekspresá via retnan sosial. E akuerdo ku pueblo kolombiano a rechasá den referèndum, ta enserá entre otro ku e rebeldenan di FARC ta entregá nan arma i konfesá nan krimennan pa evita prizòn. Ademas FARC tin garantia di 10 asiento den Kongreso te ku 2026.