Orkan Matthew a kousa hopi destrukshon na Haiti, Cuba i Bahamas.

Djabièrnè mainta Florida ta spera yegada di orkan Matthew. Pa e motibu ei gobernadó di Florida a hasi un yamada urgente na e hendenan ku ta biba den area. “Hui i sali for di bosnan kas awor, pasó e orkan aki por mata hende,” asina Rick Scott a deklará den forma dramátiko.

Orkan Matthew aktualmente ta kategoria tres, miéntras ya Florida a kuminsá sinti e efektonan. Hopi hende a kuminsá sali for di area. Entretantu e popular parke di dibertishon Disney World a sera. Esaki ta e di kuater biaha den e historia di e parke ku nan mester a sera. Durante su pasashi den Karibe, Matthew a kousa basta daño.

Ya orkan Matthew a kousa morto di 25 persona di kual 19 hende na Haiti. Gobièrnu di Haiti mester a posponé e elekshon ku tabata pa djadumingu awor na e isla. Militarnan merikano a manda helikòpter ku ayudo pa e isla. Na Cuba tambe e siudat di Varadero a sufri basta daño ku pasashi di Matthew.