Awe kolombianona bai urna den un referèndum pa aprobá e akuerdo di pas entre gobièrnu di Colombia i e gueriyeronan di FARC. Dia 26 di sèptèmber ku a pasa e dos partidonan a firma un akuerdo pa pone fin na e guera di mas largu den Latino Amerika. Despues di 52 aña a logra yega na un akuerdo ku a frakasá na hopi okashon promé.
Ora e akuerdo ta definitivo, e rebeldenan di FARC por kontinuá komo organisashon polítiko. Aktualmente tin masomenos 7000 miembro afiliá na e organisashon. E guera di FARC a kosta bida di mas ku 220 mil hende.
Te ainda pronostikonan ta indiká ku pueblo kolombiano ta bastante dividí riba e asuntu. Ta spera ku e referèndum lo bira un bataya basta pèrtá. Urnanan lo sera 11or di anochi i tin mester di voto di sigur 13 porshento di e poblashon (masomenos 4.5 mion kolombiano) pa e referèndum ta legal.
"Si pueblo kolombiano rechasá e akuerdo, nos lo aseptá esaki. Lo nifiká sí ku e guera lo kontinuá pa 20 o 30 aña mas," asina e Presidente di Colombia Juan Manuel Santos a deklará.