E promé debate presidensial entre Hillary Clinton (Demokrat) i Donald Trump (Republikano) a tuma lugá na Merka. Tabata un debate hopi intenso entre e kandidatonan. Un di e topíkonan ku nan a debatí ariba, ta e disigualdat rasial ku tin na Merka. Segun Hillary Clinton, mester bin mas posiblidat pa afro-merikanonan den e barionan menos pudiente, mientras Donald Trump ta di opinion ku mester bin mas òrdu . Durante e debate e asuntu di e akta di nasementu di presidente Obama a bolbe subi mesa. Segun e kandidato demokrata, e hecho ku Trump a pidi Obama pa mustra su akta di nasementu, ta prueba di kon rasista Donald Trump ta. E debate a kuminsá ku e topiko di ekonomia i trabou. Segun Trump, demasiado trabou ta bai eksterior, mientras ku e ta haña ku mester baha impuesto pa rikunan. Di otro banda Hillary Clinton ta haña ku mester yuda e klase media mas tantu.
Na un dado momentu a surgi un deskushon tokante kuantu impuesto Donald Trump ta paga. Den un kontra atake e kandidato a bisa : “Lo mi publiká e sifranan di loke mi a haña bèk di impuesto, si Hillary publiká e “e-mailnan” ku el a “delete”. Na final di e debate, Clinton a ataka Trump riba su forma denigrante di papia tokante hende muhé : “Esaki ta e hòmber ku a yama hende muhé tur sorto di nòmber denigrante,” asina e kandidato demókrata Hillary Clinton a splika e oudensia. E debate, ku a tuma lugá na Hofstra University, djis pafó di New York, a dura 90 minüt sin interupshon. Ta kalkulá ku sentenares di mion di hende a mira e debate.