Akuerdo di pas entre FARC i Colombia ta un realidat.


Presidente kolombiano, Juan Manuel Santos i e lider di FARC, Timochenko a firma e akuerdo di pas na e siudat kolombiano, Cartagena. Gobièrnu i e rebeldenan a negoshá 4 aña largu pa e akuerdo na e kapital kubano, Habana. Den e akuerdo, a palabrá entre otro ku FARC i gobièrnu kolombiano lo no bringa mas kontra otro. E grupo di rebeldenan lo entrega nan armanan a kambio di amnestia pa e èks-miembronan. Banda di esaki, e èks rebeldenan tin mag di drenta polítika. A firma e akuerdo ku un pèn trahá ku balanan, esaki ta “pa ilustrá e transishon di arma pa enseñansa i futuro”, segun presidente Juan Manuel Santos a bisa. El a yama e logro un “momentu históriko”. E dos lidernan bistí na blanku, simbolikamente a bisti otro un pin di palomba di pas despues di e firmamentu. Mientras e lider di FARC a rekonosé e ròl importante tambe di presidente venezolano Hugo Chaves Frias (q.e.p.d.), e presidente colombiano a rekonosé otro gran ousente durante e momentu hístoriko den persona di e eksritor Gabriel Garcia Marques (q.e.p.d.). Durante e seremonia di firmamentu tabatin vários hefe di estado presente. Entre nan sekretario di estado merikano Johnn Kerry, sekretario general di Nashonnan Uní, Ban Ki-moon i presidente di Cuba, Raul Castro. E minister ulandes pa asuntunan eksterior Bert Koenders tabata presente na nòmber di Reino Ulandes. “Easki ta un paso grandi pa pas na Colombia i stabilidat den e region,” según Koenders.

Tabatin masomenos un 2.500 persona ku a asistí na e seremonia. Djis promé ku a firma e akuerdo, a tene un seremonia religioso. Promé ku e akuerdo drenta na vigor definitivamente, e pueblo colombiano por vota djadumingu 2 di òktober den un referèndum popular. Ku un mayoría pro e akuerdo, ta bin e or’ei un fin ofisial na un guera ku a dura mas ku mei siglo i ku a kosta bida di praktikamente 220.000 persona. T a antisipá ku un mayoría di kolombianonan lo vota na favor di e akuerdo. Sinembargo tin un parti di e poblashon kolombiano, ku ke pa e kombatientenan di FARC keda persiguí. Den pasado, FARC a rekurí hopi bia na violensia, sekuestro i atentádonan ku bòm pa logra nan metanan.

Den añanan setenta a funda Fuerzas Armadas Revolucionarios de Colombia (FARC), komo grupo di protesta kontra di kapitalisashon di e pais suramerikano. Entretantu EU a skrap FARC for di su lista di terorismo. E desishon aki a drenta na vigor for di e momentu di firmamentu di di e akuerdo. Den pasado, na vários okashon, e movimentu a pidi pa kita nan for di e lista di terorismo. For di 2002, FARC ta riba e lista ei. Na su punto kulminante FARC masomenos 20.000 kombatiente. Aworaki ta kalkulá ku tin masomenos 7.000 rebelde ainda.

Ounke ku den e akuerdo ta mensioná amnestia pa e èks-miembronan di FARC, esaki no ta konta pa Simón Trinidad, un lider di FARC ku na e momentu aki ta sintando un kastigu di 60 aña den prizòn na Merka pa sekuestro di 3 kontratista. "Simón no tabata i tampoko ta parti di e akuerdo,” asina e sekretario di estado merikano, John Kerry a bisa na e okashon. "Nos ta na altura ku tin interes den esaki, pero ta un kaso di hustisia i no di asuntunan di eksterior,” Kerry a bisa.