top of page

Merka, Hapon i Sur-Korea ke mira medida mas severo kontra Nor-Korea.


Merka, Hapon i Sur-Korea ke mira medida mas severo kontra Nor-Korea. Den fin di siman e Ministernan di Asuntunan Eksterior di e tres paisnan a palabrá esaki na New York. E paisnan a papia tokante di plannan pa intensivá e pakete di medidanan kontra Nor-Korea, despues ku e pais a bolbe hasi un prueba nuklear mas grandi ku nunka promé.

Pa promé bia for di e último prueba nuklear, e di sinku kaba e aña aki, ku Minister di Asuntunan Eksterior merikano, John Kerry i su koleganan hapones Fumio Kishida i Sur-koreano Yun Byung-Se, a bini huntu pa deliberá riba e situashon. Den un deklarashon nan tur huntu a indiká ku mester bin mas preshon internashonal riba Nor-Korea. "E echo ku e régimen di Pyonggyang ta ignorá vários tratado di Nashonnan Uní, ta pone ku nos mester aktua mas severo”, e ministernan a deklará. E prueba nuklear di 9 di sèptèmber tabata esun di mas pisá ku nunka ántes Nor-Korea a yega di tene. Ekspertonan na Seoul ta kalkulá e prueba na un forsa di 10 kilotòn, ku ta algu ménos ku e bòm atómiko ku a kai riba Hiroshima na 1945. E régimen stalinista na Pyonggyang ta pretendé awor ku nan ta kapas pa ekipá un rakèt ku un kabes nuklear. Ku esei Nor-Korea ta ignorá, tur e atvertensianan di e komunidat internashonal.

bottom of page