Mark Rutte ta bisa Erdogan pa Turkia mete den asuntunan di Ulanda.

Minister-presidènt Mark Rutte a bisa Recep Tayyip Erdogan ku Ulanda lo no tolerá metementu turko den su asuntunan, pa loke ta trata asuntunan interno di Ulanda. E promé minister ulandes a bisa esaki den fin di siman, durante un kòmbersashon telefóniko ku e presidente di Turkia.

"E desaroyonan na Turkia naturalmente ta lanta sintimentunan fuerte. Pero no ta normal ku tenshonnan na otro parti di mundu ta kondusí na insidentenan na Ulanda. Mi a laga Erdogan sa ku nos no ta pèrmití metementu di Turkia den nos asuntunan doméstiko i a puntr’é si e ta dispuesto na yuda pa evitá esaki. No ta aseptabel ku ta pone gruponan na Ulanda kontra otro”, asina Rutte a splika den un rekuento di su kòmbersashon riba Facebook.

Rutte a bisa Erdogan tambe ku Ulanda ta rechasá e posibel introdukshon di pena di morto na Turkia. Segun e promé minister, despues ku a frustrá e gòlpi di estado, awor Turkia a haña un oportunidat pa fortalesé demokrasia i e derechi di estado. "P’esei ta importante pa regla tur kos despues di e gòlpi di estado, na un manera nèchi. Nos lo rechasá e introdukshon di pena di morto,” Rutte a sigui splika. E promé minister ulandes a ripití na Erdogan, ku Ulanda ta kondená e gòlpi militar na Turkia, ku kier a tumba e institushonnan demokrátiko ku forsa. "Tabata un akontesimentu ku a sòru pa un tremendo susto na Turkia. Mas ku 200 hende a muri i a bombardiá e parlamento”, Rutte a bisa.

Erdogan i Rutte por lo demas ta di akuerdo ku tantu Turkia komo Ulanda, Union Europeo i NATO ta i lo keda un sosio importante. No unikamente ku Turkia, sino tambe ku otro paisnan den region, kooperashon ta esensial. Tantu pa maneho di migrashon, komo den e lucha kontra terorismo. Nos ta tene nos mes na e palabrashonnan i nos ta spera ku Turkia na su turno tambe lo hasi esaki, Mark Rutte a finalisá.