top of page

A lanta grupo di oposishon kubano na Miami.


Resientemente presidente di Colombia, Alvaro Uribe, a manda un mensahe pa e públiko di kasi 1.000 persona, ku a reuní pa inougurashon di e grupo di oposishon kubano Inspire America Foundation, na onor di lider di oposishon, Dr Oscar Elias Biscet, na Coral Gables, Florida. Ta pa promé bia ku Uribe públikamente a duna su sosten na e lider di posishon kubano. Esnan ku tambe a felisitá Biscet, ta Senador Marco Rubio i representantenan Leana Ros-Lehtinen, Carlos Curbelo, Lincoln-Diaz Balart, embahador Jim Cason, e alkalde di Miami, Tomas Regalado i e alkalde di Hialeah, Carlos Hernandez. Biscet ta kandidato pa Premio Nobel di Pas i ko-ganadó di e medaya merikano pa pas, un onor ku e ta kompartí ku Vaclav Havel, Lech Walesa, Margaret Thatcher i Ronald Reagan. El a risibí tambe e plaka di onor di Repúblika Cheko. Na 2011, Bono a onr’é durante un konsierto di U2 na Miami. Marcell Felipe, president di Inspire Amerika a bisa: “ Nos lo no por a pidi pa un anochi mas spektakular. Ta un onor pa por tin dos invitadó importante asina den persona di e íkono di demokrasia, presidente Alvaro Uribe i un kandidato pa premio Nóbel, manera Dr Oscar Elias Biscet. Sigur sigur, nos ta mandando un mensahe kla, ku esnan ku ta lucha pa demokrasia den kontinente di Amérika, ta pará huntu ku otro” Felipe a añadí: "Nos ta spesífikamente gradisido na senador Rubio i representantenan Ileana Ros-Lehtinen, Carlos Curbelo, Lincoln-Diaz Balart i embahador Jim Cason, alkalde di Miami, Tomas Regalado i alkalde di Hialeah, Carlos Hernandez." Di acuerdo ku nan wèpsait, e mishon stablesé di Inspire America Foundation ta simpel: Inspirá demokrasia na Cuba.

bottom of page