Puerto Rico ta den estado di emergensia pa motibu di Zika.


Estados Unidos a anunsiá un estado di emergensia médiko na Puerto Rico pa motibu di e vírus di Zika. Último tempu tin mas i mas kaso di zika den e pais. Siman pasá a registrá 1914 kaso nobo i for di desèmber e kantidat a oumentá te na 10.690. Dor di anunsiá un estado di emergensia, e pais ta haña mas sèn i mas hende pa yuda pa kombatí e vírus. No a duna di konosé ki medida lo tuma pa stòp e ekspanshon. E vírus di zika ta peligroso, pasobra e por okashoná defektonan di serebro (microcefalie) serka beibinan ku no a nase ainda. E beibi por nase ku un kabes deformá. Na Puerto Rico, te ku awor, tin kasi mil muhé na estado ku ta kontagiá. Di e kantidat ei kasi shen a haña yu salú. Tin un kaso konosí di un beibi ku a nase morto ku probablemente tabatin microcefalie. Segun outoridatnan ta un kuestion di tempu pa mira si mas beibi lo nase ku microcefalie.