“Skydiver” ta bula for di avion, sin parashut.(video)


E “stuntman” merikano Luke Aikins ta e promé “skydiver” ku a bula for di un avion sin ku e la hasi uzo di un parashut. E salto tabata eksitoso.

Aikins a bula di un altura di 7.600 meter for di un avion. Despues di un kaida liber di mas o ménos 2 minüt e la aterisá den un nèt grandi ku a pone algun meter for di suela.

E homber di 42 aña aki mester a bai ku un parashut obligatoriamente si, pero e tabata sa for di prinsipio ku e lo no uza esaki. Su plan original tabata pa hasi e salto sin parashut.

E salto aki a tuma lugá na Simi Valley den e estado California. E kanal di televishon FOX a transmití e hazaña bibu. Luke Aikins a hasi mas o ménos 18.000 salto ku parashut den su bida. E la yega di hasi stunt pa vários pelíkulanan, entre otro Ironman 3.