Forsanan egipsio a mata lider importante di ISIS.


Lider di operashonnan di ISIS na e península instabil di Sinaí said al-Ansari, ku tabata e serebro tras di e akshon terorista di òktober 2015 riba un avion di Rusia den e region, a muri den un atake di Forsa Aéreo Egipsio. Asina fuentenan di inteligensia a bisa Fox News. E lider na Sinaí di ISIS, Abu Dua al-Ansari a fayesé na Al Arish, segun e mésun fuentenan. Un mensahe riba página di Facebook di e bosero militar prinsipal, Brigada-General Mohammed Samir, a bisa ku said al-Ansari a muri den un operashon guiá pa “inteligensia ku presishon”. Según investigadónan, el a yuda organisá aktividatnan di ISIS den e region inkluso atakenan kontra personal di Nashonnan Uní den nan base na Sinaí. Den un atake riba e avión Metrojet dia 31 di òktober 2015, ta sospechá un mekániko di aviashon, ku ta primu di said al-Ansari. El a uni su mes ku ISIS na Siria i a pone un bòm riba e buelo na aeropuerto Sharm el-Sheikh. E avion a eksplotá den firmamentu na Egipto despues di a lanta vuelo, kousando morto di tur 224 persona na bordo. Forsa militar na Egipto a skibi riba nan página di Facebook ku durante e atakenan aéreo nan a mata tambe 45 kombatiente ISIS i a destruí un depósito importante di arma i bala.