Outoridat merikano ta atvertí muhénan na estado pa por lo pronto evitá un bario den siudat di Miami, pasó sanguranan por plama e virus di zika. CDC, e instituto nashonal di salubridat públiko na Merka, a bin ku hopi atvertensha, pasó a registrá dies kaso di zika den e bario Wynwood. Na tur tin dieskuater persona den e área infektá ku e virus dor di sanguranan lokal.
Siman pasá a anunsiá e promé kasonan di kontaminashon na Florida. Promé ku esei, tur merikano ku a haña e virus di zika, tabata debí na estadia den eksterior òf dor di sèks insigur.
CDC ta atvertí muhénan na estado pa no biaha mas pa e ‘área di zika’ na Miami. Muhénan na estado ku ta biba einan, mester tuma medidanan èkstra pa evitá piká di sangura i mester laga hasi un tèst riba e virus. Tambe e instituto ta atvertí hòmber i muhénan ku a bishitá Wynwood pa warda sigur ocho siman promé ku purba sali na estado o tene relashon. E virus di zika ta peligroso pasó e por okashoná defektonan selebral serka muchanan ku no a nase ainda. Beibinan por haña un kabes deformá.