top of page

Kombatiente di ISIS na Trinidat ta urgi pa violensia kontra kristiannan.


E Trinidadiano Abu Sa’d al-Trinidadi ta entre e portabosnan di ISIS den Karibe. Na varios pais ta urgi simpatisantenan di e organisashon terorista, inkluso moslemnan na Trinidad & Tobago ku ta hasi yamada pa lansa atakenan kontra kristiannan di e país. al-Trinidadi su istoria a aparesé den e edishon di yüli di Dabiq, e su revista “online” di ISIS, ku ta sali for di aña 2014, asina e korant “The Trinidad Guardian” a reportá. E edishon di yüli dje revista, ta basá riba e tema: “Kibr’e krus” na ingles “Break the cross”. FOTO (ariba) sin fecha di un hende lokal di Trinidad & Tobago den uniform di frankotiradó, ku a sali publiká huntu ku e artíkulo den e revista Dabiq di The Islamic State (ISIS) Minister di seguridat nashonal na Trinidat & Tobago, Edmund Dillon a deklará ku agensianan di inteligensia ta investigando e deskripshonnan den e artíkulo den komparashon ku indivíduonan konosí ku a bai Siria entre 2011 i 2016. E artíkulo a aparesé tambe serka agensianan di komunikashon franses, aleman, europeo i ingles. E ta riba saitnan merikano, serka gruponan di vigilansia di anti-terorismo global i media oksidental.

Den e artíkulo, al-Trinidadi ta pretendé di ta un kristian ku a kombertí na islam i ku awor e ta un di e hopi mujahidinnan di T&T ku ta ku ISIS. E artíkulo ta mustra tambe imágen di otro nativonan di Trinidad & Tobago huntu ku ISIS, inkluso Shane Crawford, ku a keda indentifiká di a uni na e grupo di terorismo. Crawford ta un studiante islamítiko di Ashmead Choate, den sur di Trinidad. al-Trinidadi ta elogiá e studiante pa motibu ku e ta sigui e pasonan na jihad. Al-Trinidadi a konfirmá di ta un frankotiradó (“sniper”) i ku e tabata involví den krimen, promé ku el a bandoná Trinidad & Tobago.E ta akusá entre esnan ku a plania pa asesiná eks promé minister dje isla Kamla Persad-Bissessar. E terorista a deklará ku e i dos kolega Abu ‘Abdillah i Abu ‘Isa ta entre e promé tres moslemnan lokal ku a uni nan mes na ISIS. E la bisa ku e dos koleganan a muri asesiná. E ta sigurá ku masomenos 60% di e “mujahidin di Trinidad” ta bin di famianan moslem i e sobrá 40% a bira moslem despues. Den e artíkulo, al-Trinidadi a manda un mensahe pa moslemnan na Trinidad : Mi ta bisa boso tambe mi rumannan, awor boso tin un oportunidat di oro pa hasi algu ku hopi di nos a desea di por a hasi mesora. Boso tin e abilidat pa terorisá e infielnan den nan propio kas i pone nan sanger kore den nan kayanan. Nan ta bombardiá boso ruman hòmbernan i boso ruman muhénan den e pais kaminda Allah su lei ta supremo. Ta un obligashon pa boso aktua i fòrsa nan pa pensa tres bia promé ku nan bombardiá moslemnan. Pesei, terorisá e infielnan i laga nan sinti miedu tur kaminda, te asta den nan propio kambernan. Dor di nan simpel infieldat, nan sanger pa nan propio falta ta legalmente dramá.” e mensahe ta bisa. Tambe el a splika kon el a haña su kaminda pa jihadismo. Tabatin un grupo di moslem konosí pa su militansia. Su miembronan a trata na tumba e gobièrnu infiel, pero nan a entregá lihé na apostasia i bai partisipá den e religion di demokrasia., demostrando asina ku nan no tabata riba e metodologia korekto di jihad.

bottom of page