Na komienso di e siman akí, minister di eksterior brazileño, José Serra (foto), a manda un karta pa miembronan di Mercosur, pa kritiká e desishon di Uruguay pa pasa e liderasgo di e bloke den man di Venezuela, debí ku e presidensia di MERCOSUR ta vakante. E atministrashon di e presidente venezolano, Nicolás Maduro, ta esun ku lo mester a risibí e presidensia di MERCOSUR, kual según sekuensha alfabetiko, entrante promé di ougùstùs ta rotativo pa seis luna. Sinembargo, Serra a bisa luna pasá ku ainda Venezuela tin ku kumpli ku eksigensianan pa su miembresia ta kompletu, entre nan mehorá derechonan humano i prinsipionan básiko di demokrasia. Además e Venezuela mester baha bareranan ku ta opstakulisá komersio. Serra a konvensé e bloke pa puntra Venezuela pa kumpli ku e reglamentunan di MERCOSUR i proveé evidensia di progreso mas lat den ougùstùs. Miéntras tantu, den un akto di desafio dirigí riba Estados Unidos, Presidente Maduro a nombra General Néstor Reverol, e èks hefe di Guardia Nashonal di Venezuela i su agensia di antidroga, komo Minister di Interior i Hustisia, na enkargo di forsanan polisial di e pais. Sin embargo den un diktámen, un dia promé ku su nombramentu, hustisia na New York a kai kontra di Reverol, pa e echo ku ela yuda pasa un karga di miles di kilo di kokaina pa drenta Merka. Ta akusá Reverol huntu ku General Edylberto Molina, aktual enkargado militar na Berlin, pa nan asistensia na trafikantenan di droga Colombiano. Nan lo a yuda pa kontrabandiá tonelada tras tonelada di kokaina for di Colombia via Venezuela i despues via di Amérika Sentral i México pa drenta Merka.