Na Jamaica e refineria ALPART di aluminio ta pasa den man di e entidat chines Jiuquan Iron and Steel Company (JISCo). Minister di Transporte i Mina, Mike Henry a bisa ku a firma un akuerdo di interes pa traspaso entre JISCo i e firma di aluminio ruso UC Rusal, ku tabata operá e refineria. Dia 19 di yüli último, representantenan di e dos entidatnan a firma e akuerdo na China. Henry, huntu ku e titular di Siensia, Energia i Teknologia di Jamaica, Dr. Andrew Wheatley, a fungi komo hefe di un delegashon ku a atendé e seremonia di firmamentu. Durante di un rueda di prensa siman pasá, Henry a deklará ku ta spera di JISCo ku nan lo kompletá e tumamentu kompletu di e planta ALPART na novèmber di e aña aki.
Esaki lo duna e entidat e posibilidat pa invertí un suma total di US$ 220 mion, den e promé fase, pa modifiká i aktualisá e planta. Durante e temporada di transishon, un tim tékniko di JISCo lo bishitá ALPART pa kondusí un estudio i dearoyá diseñonan básiko, komo parti di e trabou di preparashon. Henry a indiká ku e proyekto ta planiá pa kore di desèmber 2016 te desèmber 2017, i na final ta spera ku no solamente lo baha e gastunan di produkshon sino tambe lo trese mas efisiensia den e parti di produkshon. Tambe e minister a bisa ku nan lo pone hopi atenshon, pa perkurá den e parti di protekshon pa medio ambiente, durante di e implementashon di e proyekto.