Assange (Wikileaks) : ‘Nos tin mas material relashoná ku e kampaña di Hillary Clinton’


Fundadó di WikiLeaks Julian Assange ta broma kon e sakamentu di e emailnan ‘di ‘hack’ di e Komité Nashonal Demókrata ta afektando e elekshon presidensial di Estados Unidos i ta bisa ku tin informashon riba e kampaña di Hillary Clinton ku no a sali na kla. Durante e programa “Anderson 360”, Assange a bisa Anderson Cooper : “Nos tin mas material relashoná ku e kampaña di Hillary Clinton. Ta bon pa bisa esei.”

Assange tabata masha diskreto kon WikiLeaks a yega na informashon sibernétiko interno di e Partido Demókrata. Dos ofisial di polis a bisa CNN ku FBI i Departamento di Hustisia ta investigando un ‘hack’ di kòmpiuter di e nominado demókrata pa e kampaña presidensial di Hillary Clinton. E imeilnan ku a keda publiká ta revelá ku tabatin entrada sin pèrmit den otro organisashonnan di Partido Demókrata.

E publikashon a kousa inkietut grandi den e partido, ku komo konsekuensia e retiro inmediato di e presidente di Komishon Nashonal Demókrata, Debbie Wasserman Schultz. Assange a bisa ku sakamentu di e informashon tabata planiá pa kai huntu ku e komienso di e Konvenshon Nashonal Demókrata. “Nos tabata sa ku e or’ei lo tin hopi interes di lesadónan, pero tambe, ta nos responsabilidat. Si nos a publik’é despues, bo por imaginábo kon asombrá e pueblo ku ta vota pa e Demókratan lo tabata. E mester tabata promé (ku e konvenshon).”

Cooper a puntra Assange si e ‘hack’ tabatin di haber ku su “asuntu personal” kontra Clinton. “Tin un pregunta si bo tin un asuntu personal kontra Hillary Clinton. Bo a kritik’é riba un kantidat di asuntu. Bo a duna un entrevista na e kadena britániko den yüni, kaminda ku bo ta sugerí ku bo ta mas preokupá ku Clinton, en kuanto libertat di prensa, ku Donald Trump. Bo ta para tras di esei? E ta basá riba un asuntu personal?” Cooper a puntra.

Pero Assange a rechasá e idea ku e kier a hasi daño na Clinton. “Bo por bai bèk i skucha e entrevista. Ami nunka a bisa ku mi ke hasi Hillary Clinton daño, nada di esei,” el a bisa. “Ta e presentadó a usa e terminologia ei.”

Klek riba foto pa wak e entrevista.

Assange a bisa tambe ku tin mas material ku ta bai sali ku ta “sumamente interesante”. El a bisa: “Nos tin mas material relashoná ku e kampaña di Hillary Clinton. Ta bon pa bisa esei. Eseinan ta sumamente interesante. Nos lo mira kiko lo para di nan.”

Assange a papia for di e embahada ekuatoriano na London, kaminda e ta enfrentando ekstradishon riba atakenan en tokante insinuashonnan seksual.