Tur pasahero den un balon di airu kayente a muri den aksidente na Texas.

Djasabra durante dia, un balon di airu kayente ku sigur 16 persona den dje a kai na estado merikano Texas. Outoridatnan a splika medionan lokal ku niun hende no a sobrebibí e aksidente. “Tur kos ta mustra ku niun hende no a skapa”, asina Daniel Law ku ta “country sherriff” na Texas a splika medionan lokal. Ekspertonan a kuminsá inventarisá e viktímanan pa determiná nan ídentidat. E balon a pega na kandela den laira i a kai riba un tereno habrí den e area di Lockhart na parti sur di siudat Austin. Outoridatnan di aviashon merikano FAA, National Transportation Safety Board i FBI ta investigando kiko por tabata kousa dje aksidente. Esaki ta un di e aksidentenan ku balon di airu kayente, di mas grandi i mortal ku Merka a konosé.